آآآه ..منك يا أناني
لما كنت .. كسيح محطم ..
مالقيت عِنْ غيري مرسى
لما لميت ليك شتاتك
وإحتويت .. نزفك وضمدت لجراحك
ماإفتكرتك يوم بتقسى
،،
لما .. فاضت روح قليبك بي سهم خاين وغادر
وكُلو شي آمنت بيهو فقدتو بين زيف المشاعِر
جيت حييت في ذكرياتك كلمة أنسى
وإنتشلتك من ضياعك .. قلت ترسى
وذااااتي بيك وليك أرسى
،،
كنت راجياك يوم تجيني
تحتويني
تكتب أشعارك في ريدي
وتكتم ..آهاتي وأنيني
أنسى بيك الكان بيحصل
والحيحصل
والأسى الممكن في بكرة ,, يغشى دنيايا ويجيني
،،
رجيت .. وتاهت في إنتظارك
بوصلة حلمي المعشعش بين دريبات الأماني
بَحّ صوتي الكان بيترجى رجوعك
وكان بيصرخ ليكَ بي كُل المعاني
لا جاني منك صوت ينادي
ولا صداي السبتو عندك عادني تاني
،،
الملاذ الكستو بين وطنك .. نفاني
الدروب المارقة منك.. لخبطت كوني وكياني
القليب العشت بيهو نضيف ..وأبيض
صار .. مُقسّم ولونو من كُتر البُكا ..
إحْمّرَ قاني
،،
و..
آآه منك .. يامُخادع ياأناني
آآآه .. من الوعد السراب
آآه .. من الذُل والعذاب
وآآآآه .. من رداً مُشلهت لي جواب
لا بيسمن لا بيفيد بعدو العتاب
[center]
