أبكيكِ وقَبْلِك ما بكيت راحل !!

أبكيكي ...

وقبْلِك ما بكيت راحِل

و كم من ناس زمان رحلوا

وكم فتّشت لي دمعة

عشان حيد الحزن أصَلو

بس مسعايا ياما خاب

بكى الجلمود...

إلا ّ دموعي ما نزلو

أبكيك وأنا القائل

مكامْن الدمعة ...

في عينيّ مااتخلقو

ولا العبرة...

في جوّاي لقت مسْرَى

ولا درْبا ً....

مشاه الحزْن زمان طرقو

أبكيكِ و شايْف الكون ...

بدون رسْمِك ...

تقول نيْزك هوى وحرقو

أبكيكي وهبْت بُكاك ...

سنيني الباقية من عمري

واريتو يطول عشان أبكي

بُكايا ً ما بكا القُمري

واريتو يطول عشان النار

تربّي لظاها من جمْري

دكّ الحزن صِلِفْ فولاذ

وداب في الحال بحور تجري

أبكيكي وصورة الموت

ماياها البخافها قَبُل

ولا الكانت مهيبة زمان

مادام في سوحو شاد قصْرِك ...

أكيد الموت رُباهُ امان

مادام روّّح وافل عصْرِك

شنو الحارسِنّو تاني كمان !!؟

زي ما كنتَ في الأيام

بَرْجَى متين يهل بدْرك

هداني الليلة راجي رَدايْ

صدِي و ولهان

كأن العيد سكون قبْرِك !!

أبكيكي وعارْفو بكايا ماقدْرِك

بس قدَري في الحالين ..

أعيش يا سمحة قيد أسْرِك !!!

أبكيكي وقبْلِك ما بكيت راحل

وكم من ناس كتير رحلوا !!!